കിച്ചൻ, കബോർഡ്, TV യൂണിറ്റ് എന്നിവയുടെ പണിക്ക് മൈക്ക വാങ്ങുകയാണോ? ഗ്ലോസി വേണോ, മാറ്റ് വേണോ? തെറ്റിയാൽ പണി കിട്ടും!

വീടിന്റെ കിച്ചൻ, ബെഡ്റൂം വാർഡ്രോബ്, TV യൂണിറ്റ് എന്നിവയ്ക്കായി മൈക്ക തിരഞ്ഞെടുക്കുമ്പോൾ നിറത്തിന്റെ കാര്യത്തിൽ മാത്രമല്ല, ഫിനിഷിന്റെ കാര്യത്തിലും പലർക്കും കൺഫ്യൂഷനുണ്ട്. ഗ്ലോസി, മാറ്റ്, സെമി മാറ്റ്… ഇവയിൽ ഏതാണ് നല്ലത്? കാണാൻ ഭംഗിയുള്ള നിറം തിരഞ്ഞെടുത്താൽ മാത്രം മതിയോ?

ഓരോ ഫിനിഷിനും അതിന്റേതായ പ്രത്യേകതകളുണ്ട്. ഉപയോഗിക്കുന്ന സ്ഥലത്തിന് അനുയോജ്യമായത് തിരഞ്ഞെടുക്കാത്തപക്ഷം പിന്നീട് പാടുകൾ, വിരലടയാളം, പോറലുകൾ എന്നിവയെക്കുറിച്ച് പരാതിപ്പെടേണ്ടിവന്നേക്കാം. അതുകൊണ്ട് മൈക്ക വാങ്ങുന്നതിന് മുമ്പ് ഈ വ്യത്യാസങ്ങൾ അറിഞ്ഞിരിക്കാം.

1. കിച്ചൻ കാബിനറ്റിന് ഗ്ലോസി വേണോ, മാറ്റ് വേണോ?

കിച്ചണിന് തിളക്കമുള്ളതും പ്രീമിയവുമായ ലുക്ക് നൽകാൻ ഗ്ലോസി മൈക്ക ഉപയോഗിക്കാം. ഇതിന്റെ പ്രതലത്തിൽ വെളിച്ചം പ്രതിഫലിക്കുന്നതിനാൽ കിച്ചൻ കൂടുതൽ തെളിച്ചമുള്ളതായി തോന്നാം. എന്നാൽ ചില ഗ്ലോസി ഫിനിഷുകളിൽ വിരലടയാളവും ചെറിയ പോറലുകളും എളുപ്പത്തിൽ ശ്രദ്ധയിൽപ്പെടും. അതിനാൽ ഇടയ്ക്കിടെ വൃത്തിയാക്കേണ്ടിവരാം.

മാറ്റ് മൈക്കയക്ക് തിളക്കം കുറവായിരിക്കും. സിമ്പിളും മോഡേണുമായ കിച്ചൻ ഡിസൈനുകൾക്ക് ഇത് അനുയോജ്യമാണ്. എന്നാൽ എല്ലാ മാറ്റ് ഫിനിഷുകളും പാടുകൾ മറയ്ക്കണമെന്നില്ല. ചിലതിൽ എണ്ണപ്പാടുകളും കൈപ്പാടുകളും പ്രകടമാകാം.

സെമി മാറ്റ് ഇവ രണ്ടിനും ഇടയിലുള്ള ഫിനിഷാണ്.അമിതമായ തിളക്കമില്ലാതെ നേരിയ ഷൈൻ ലഭിക്കും. കിച്ചണിൽ ഭംഗിക്കൊപ്പം പരിപാലനസൗകര്യവും പ്രധാനമാണെങ്കിൽ ഈ ഫിനിഷും പരിഗണിക്കാം.

2. ബെഡ്റൂം വാർഡ്രോബിന് ഏതാണ് കൂടുതൽ അനുയോജ്യം?

വാർഡ്രോബ് മുറിയിൽ വലിയൊരു ഭാഗം ഉൾക്കൊള്ളുന്നതിനാൽ അതിന്റെ ഫിനിഷ് മുറിയുടെ മൊത്തത്തിലുള്ള ഭംഗിയെ സ്വാധീനിക്കും.

മുറിക്ക് ശാന്തവും എലഗന്റുമായ ലുക്ക് വേണമെങ്കിൽ മാറ്റ് ഫിനിഷ് തിരഞ്ഞെടുക്കാം. തിളക്കമുള്ളതും വെളിച്ചം പ്രതിഫലിപ്പിക്കുന്നതുമായ ലുക്ക് ഇഷ്ടമാണെങ്കിൽ ഗ്ലോസി അനുയോജ്യമാണ്. രണ്ടിന്റെയും ഇടയിലുള്ള ഭംഗി വേണമെങ്കിൽ സെമി മാറ്റും പരിഗണിക്കാം.

വാർഡ്രോബിന്റെ വാതിലുകൾ ഇടയ്ക്കിടെ കൈകൊണ്ട് തുറക്കുന്നതിനാൽ വിരലടയാളം എത്രത്തോളം കാണുന്നു എന്നതും ശ്രദ്ധിക്കണം. പ്രത്യേകിച്ച് ഇരുണ്ട നിറങ്ങളിലുള്ള ചില ഫിനിഷുകളിൽ കൈപ്പാടുകൾ കൂടുതൽ പ്രകടമാകാം. അതിനാൽ സാമ്പിൾ നേരിട്ട് പരിശോധിച്ചശേഷം തീരുമാനിക്കുന്നതാണ് നല്ലത്.

3. TV യൂണിറ്റിൽ ഏത് ഫിനിഷാണ് ഭംഗി കൂട്ടുന്നത്?

TV യൂണിറ്റിന് മാറ്റ് ഫിനിഷ് നൽകുമ്പോൾ ലളിതവും മോഡേണുമായ ലുക്ക് ലഭിക്കും. വുഡ് ഫിനിഷിനൊപ്പം ഇത് ഉപയോഗിക്കുമ്പോൾ മനോഹരമായ കോമ്പിനേഷനുകൾ ഒരുക്കാനും കഴിയും.

ഗ്ലോസി ഫിനിഷ് ഉപയോഗിച്ചാൽ തിളക്കമുള്ള ലുക്ക് ലഭിക്കും. എന്നാൽ TV സ്ക്രീനിന് സമീപമുള്ള പ്രതലങ്ങളിൽ ലൈറ്റിന്റെ പ്രതിഫലനം ഉണ്ടാകുന്നുണ്ടോ എന്ന് ശ്രദ്ധിക്കണം. സെമി മാറ്റ് തിരഞ്ഞെടുക്കുമ്പോൾ മിതമായ തിളക്കം ലഭിക്കും.

മുഴുവൻ യൂണിറ്റിലും ഒരേ ഫിനിഷ് നൽകണമെന്നില്ല. വുഡ് ഫിനിഷിനൊപ്പം മാറ്റോ സെമി മാറ്റോ ഉപയോഗിക്കുകയും ചെറിയൊരു ഭാഗത്ത് ഗ്ലോസി നൽകുകയും ചെയ്യുന്നത് വ്യത്യസ്തമയ ഡിസൈൻ ഒരുക്കാനുള്ള ഒരു മാർഗമാണ്.

4. ഗ്ലോസി, മാറ്റ്, സെമി മാറ്റ്: പ്രധാന വ്യത്യാസങ്ങൾ

ഗ്ലോസി: കൂടുതൽ തിളക്കം; വെളിച്ചം പ്രതിഫലിപ്പിക്കും. എന്നാൽ ചില ഫിനിഷുകളിൽ കൈപ്പാടുകളും പോറലുകളും കൂടുതൽ പ്രകടമാകാം.

മാറ്റ്: തിളക്കം കുറവ്; ശാന്തവും എലഗന്റുമായ ലുക്ക്. എന്നാൽ ചിലതിൽ എണ്ണപ്പാടുകളും വിരലടയാളങ്ങളും കാണാം.

സെമി മാറ്റ്: മിതമായ തിളക്കം; ഗ്ലോസിയുടെയും മാറ്റിന്റെയും ഇടയിലുള്ള രൂപം. 

ഏത് ഫിനിഷാണ് കൂടുതൽ കാലം ഭംഗി നിലനിർത്തുകയെന്നത് ഫിനിഷ് മാത്രം തീരുമാനിക്കുന്ന കാര്യമല്ല. മൈക്കയുടെ ഗുണനിലവാരം, ഉപയോഗം, പരിപാലനം, സ്ഥാപിക്കുന്ന രീതി എന്നിവയും പ്രധാനമാണ്.

5. മൈക്ക വാങ്ങുന്നതിന് മുമ്പ് ഈ കാര്യങ്ങൾ പരിശോധിക്കണം

നിറം കാറ്റലോഗിൽ കാണുന്നതുപോലെ വീട്ടിലും തോന്നണമെന്നില്ല. കടയിലെ ലൈറ്റിങ്ങും വീട്ടിലെ വെളിച്ചവും വ്യത്യസ്തമായതിനാൽ സാധ്യമെങ്കിൽ സാമ്പിൾ വീട്ടിൽ കൊണ്ടുവന്ന് പരിശോധിക്കുക.

മൈക്കയുടെ പ്രതലത്തിൽ കൈവെച്ച് വിരലടയാളം എത്രത്തോളം കാണുന്നുവെന്ന് നോക്കുക. ചെറിയ പാടുകൾ വൃത്തിയാക്കാൻ എളുപ്പമാണോ എന്നും പരിശോധിക്കുക. കിച്ചണിലേക്കാണ് വാങ്ങുന്നതെങ്കിൽ ഈർപ്പവും പതിവായുള്ള വൃത്തിയാക്കലും പരിഗണിച്ച് ഉൽപ്പന്നത്തിന്റെ ഉപയോഗനിർദേശങ്ങൾ മനസ്സിലാക്കുക.

മൈക്കയുടെ നിറം മാത്രം നോക്കി വാങ്ങരുത്. കിച്ചണിന് തിളക്കമുള്ള ലുക്ക് വേണമോ, വാർഡ്രോബിന് എലഗന്റ് ഫിനിഷാണോ വേണ്ടത്, TV യൂണിറ്റിൽ വെളിച്ചത്തിന്റെ പ്രതിഫലനം ഒഴിവാക്കണോ തുടങ്ങിയ കാര്യങ്ങൾ ആദ്യം തീരുമാനിക്കുക. അതിനുശേഷം ഫിനിഷും നിറവും തിരഞ്ഞെടുക്കുമ്പോൾ പണം ചെലവാക്കിയശേഷം നിരാശപ്പെടാനുള്ള സാധ്യത കുറയ്ക്കാം.